Ko Rongomaraeroa te ingoa o te marae o Te Papa, he wāhi huihuinga ā-hapori. Kua tapaina a Rongomaraeroa ki te ingoa o tētahi wāhi wānanga o ngā atua, ki te whakatau i ngā take.

Ānō he korowai rongo mau. He wāhi wānanga i ngā take whai tikanga ki te motu whānui.

Ko Rongomaraeroa te whakatinanatanga o te tuakiri kano-rua o te motu. He tuku pōwhiri, he tuku tikanga, he tuku mahi whakaari hoki. Ko te nuinga o ngā marae, nō ngā hapū heoi ko tēnei marae ahurei, nō ngāi Aotearoa.

Toroa te marae

Me tīmata mā te whāwhā i te iho. He pounamu. He mauri e pūmau iho ai ngā tikanga o te marae.

Titiro ki raro – e tohu ana te marae ātea i a Papatūānuku. Ana, titiro ki runga – e tohu ana ngā matapihi ōpure kikorangi i a Ranginui.

E whātoro atu nei te marae ātea ki waho. E kai ō mata ki te wahapū.

Te Hono ki Hawaiki

Ko Te Hono ki Hawaiki te ingoa o tēnei wharenui hou. Arā, he kākano i ruia mai i Rangiātea, i Hawaiki pū.

Ko ngā poupou hou o te whare he tūpuna nō ngā hau e whā – tatū ake ki ētahi atu tūpuna i ū mai rā ki tēnei whenua i te 200 tau kua pahure.