Ki konei ki Te Taiao | Nature, he kaihōpara o Aotearoa koe, arā, he ika whenua urutapu tēnei i mua i te taenga mai o te tangata.

Ko tā tēnei rohe rāwekeweke he whakauruuru i te pūtaiao Pākehā me te mātauranga Māori. Tūhuratia ngā kararehe o Aotearoa he whanokē, he whakamīharo hoki, tēnei whenua rū, me ngā huarahi auaha e tiakina nei ā tātou taonga māori.

Te Ika Whenua

I te whakaaturanga o Te Ika Whenua, whāia ngā tapuwae o Māui. Ki konei tūtaki atu ai ki a ngāi kararehe, ki tētahi rango pekapeka tae atu ki tētahi moa tipua. Rapua nā te aha i tipua ai, i rerekore ai – i whanokē noa ai.

Whakarūaumoko

Ko tā Whakarūaumoko he tirotiro ki ngā tōpana ā-nuku – ko te ao o Rūaumoko, atua o ngā puia me ngā rū whenua. Mātakina tētahi ataata tāoreore o te pahūtanga nui i hua mai ai ko Taupō-nui-a-Tia, ka mutu, kia rūrūtia koe i te Whare Rū.

Te Kōhanga

Kei roto i Te Kōhanga, pākia ngā hua manu kia kitea ai ko ēhea kei te nui te ora, kei te tata ngaro, kua ngaro rānei. Mēnā kei te ora tonu i tēnei rā, ka tangi mai tōna reo.

Ngā Kaitiaki

I te whakaaturanga o Ngā Kaitiaki, ka tūtaki koe ki ētahi o ngā kīrehe kino rawa atu kua whakaurua ki Aotearoa. Tirohia mēnā e ora ana ngā wai o uta, o tai, kia whakatata atu ki te ngū tipua, ā, tomo atu ki a Tāne Tokorangi hei āwhina kia waro kore ai a Aotearoa.

Kei te hiahia whakangā?

Kia whakangā – ki Te Whare Rākau, ki Te Papa Hui rānei.

Whakawhiti rānei i te piriti atu i Te Whare Rākau ki Te Ngahere, ki waho hāereere ai.